(لـــولاك غالـــي..) نصيحه

السلام عليكم ورحمة الله وبركاته



لولاك غالي مالتفت لك موصّيك
لكن خذ مدادك وجهز يراعك

يشكي ومن زودالشكايه يشاكيك
عساك ترعى للمفيد استماعك

دوّر عن اللي حزّة الضيـق يشريك
وابعد عن اللّي لاقسى الوقت باعك

ترى غنيّ النفس بالطيب يغنيك
والاّ الردي لاصاعك الظرف صاعك!

يجني بهالدنيا غموض وشرابيك
ياما غلط كيلك بمدّك وصاعك!

العذب مايرويك من كفّ مسقيك
ويروي الهماج اذا حصل من ذراعك

والحكمه الحكمه قبل ذيك أو ذيك
اضبط قرارك قبـل ترفع شراعك

واحذر تكبر مايفيدك تعاليك
بئس المتاع ان كان هذا متاعك

ليت الملوك يركدون المماليك!
إذا جهل باعك يعرفون باعك!!

يقول الاوّل مازكى قيمة الديك!
الملح مايروي ويشبع جيـاعك!!

في كلّ خطوه خلّ دينك يباريك
وابذل من الطيبه قدر مستطاعك

ابسط كفوف الجود في كفّ عانيك
بخلك ترى يرسخ بحال انقطاعك

وتصير حكوة بين ذولا وذوليك
وشلون مافكرت قبل اندفاعك!؟

راع البشر لاتترك الناس تشنيك
ولا تستغرب كان ماجاه راعك

راعي السنع من بد الازوال يشفيك
وانت انتبــــه! لازم تعدّل طباعك

زال الجبل مازال طبعٍ يخاويك
عن شقّ فعلك عـــاجزاتٍ رقاعك

خلّك صريح وواضحٍ في مباديك
لاتلبس قناعك وتفصخ قنـاعك

وكانك تبي تعيد عصر الصعاليك!!
ماأنت محصّـــل غيــــر ريحة ط . .عك!!

تسلمى اختى علياء على الانتقاء الجميل ....

دمت ودام نبض قلبك وقلمك

تقبلي مرورى المتواضع مع احترامى وتقديري

تعجز الكلمات ان تعبر ما يجول في نفوسنا
احيانا لكن لا يعجز القلب ان يدعو لك
بالرقي في الدارين زادك الله من فضله
تسلمى علياء